Dragoç, Shkoder – Një ngjarje e rëndë ka tronditur banorët e zonës së Dragoçit mëngjesin e sotëm, ku 33-vjeçari Ramazan Mataj është gjetur i pajetë brenda makinës së tij. Sipas burimeve, viktima është qëlluar me breshëri kallashnikovi nga të paktën dy autorë të dyshuar, të cilët i kanë zënë pritë mbrëmjen e 4 janarit 2025.
Ngjarja u zbulua rreth orës 07:15 nga banorët, të cilët njoftuan policinë pasi gjetën trupin e pajetë të të riut në makinë. Mataj kishte plagë të shumta plumbash në pjesën e sipërme të trupit.
Detajet e ngjarjes
Banorët kanë treguar se gjatë natës kanë dëgjuar të shtëna, por kanë menduar se ka qenë fishekzjarre, për shkak të pranisë së një lokali dasmash në zonë. Viktima nuk njihej si person problematik as nga policia dhe as nga komuniteti lokal.
Sipas hetimeve paraprake, makina e Matajt është qëlluar nga të dyja palët, duke lënë të kuptohej prania e të paktën dy qitësve. Fatkeqësisht, mungesa e kamerave të sigurisë në zonë vështirëson identifikimin e autorëve. Policia po shqyrton pamjet nga kamerat në distanca më të mëdha, por deri më tani nuk ka asnjë gjurmë konkrete të autorëve.
Kthimi nga Belgjika dhe motive të paqarta
Ramazan Mataj ishte kthyer në Shqipëri rreth një vit më parë nga Belgjika, por ende mbeten të paqarta motivet dhe rrethanat e kësaj ngjarje. Aktualisht grupi hetimor i ngritur në bashkëpunim me Prokurorinë e Shkodrës po punon intensivisht për zbardhjen e dinamikës dhe motiveve të atentatit.
Policia vijon kontrollet dhe mbledhjen e dëshmive nga banorët e zonës. Çdo informacion mund të jetë i vlefshëm për hetimin.
